A Lame Tribute to J. J. Cale

Stórskemmtileg stemmning í miðborginni

Það var virkilega gaman að taka þátt í hátíðarhöldunum í gær, en skemmtileg stemmning myndaðist á Skólavörðustígnum/Laugavegi/Bankastræti þegar félagar í Krúser klúbbnum óku um á "köggum" sínum og Blúsmóbíllinn var algjör snilld!

Kvöldið var líka vel heppnað á Café Rosenberg og vona ég að gestir hafi skemmt sér hið besta!

Blús í miðborginni

Risafrétt en lítið um viðbrögð?

Finnst þetta náttúrulega með ólíkindum en ætti kannski ekki að koma á óvart! Greinilegt að eigendur og lánadrottnar geta haft og hafa haft áhrif á fréttaflutning einkarekinna fjölmiðla. Þarf kannski að fara fram allsherjar rannsókn á því hvað einkareknu fjölmiðlarnir hafa verið að segja? Er hugsanlegt að þeim hafi verið gert að fjalla ekki um útrás "útrásarvíkinganna" og eignarhald þeirra á bönkum og "pappírssölu" á fyrirtækjum til sjálfs sín?

Það verður erfitt að trúa nokkru sem fram kemur þessum fjölmiðlum framar!

Upptaka af útskýringum ritstjóra DV

Það er von...

Mikið er ánægjulegt að Bandaríkjamönnum bar gæfa til að velja Obama sem forseta. Held reyndar að ekki verði um neinar svakalegar breytingar og að hann verði í vandræðum með endurkjör eftir fjögur ár. Almenningur hér á landi gerir sér kannski ekki grein fyrir því hversu erfiður þessi sigur hefur í raun verið, því það hefur verið gífurlegur þröskuldur fyrir marga að stíga yfir að kjósa blökkumann í forsetaembættið. Kannski 24 þættirnir hafi eitthvað haft að segja að almenningur í BNA hafi átt auðveldara með að sjá þetta fyrir sér!

 

Titilvörnin hefst í kvöld!

Boston Celtics hefja titilvörnina í kvöld gegn Cleveland og draga titilfána nr. 17 í loftið í "The Garden".

Rifjaðist upp fyrir mér að fyrir ári síðan mætti ég á opnunarleik Celtics í Boston í leik gegn Washington og sagði þá að ég hefði verið á staðnum þegar vegferðin að titli nr. 17 hófst! Reyndist hafa rétt fyrir mér! Verð þó að viðurkenna að ég hefði líka viljað vera með Friðriki Inga á sjötta leiknum gegn Lakers er Celtics tóku titilinn!

Hlakka til að fagna titli nr. 18 næsta sumar!

Mín spá: NBA úrslitakepnin 2008-2009

Úrslitakeppni Austurströnd:
8 liða úrslit
1.    Boston Celtics  4– New York Knicks 1
2.    Cleveland Cavaliers 4 – Atlanta Hawks 2
3.    Orlando Magic* 4 – Philadelphia 76ers 3
4.    Toronto Raptors 4 – Detroit 3
*Vinna Suðausturriðil

4 liða úrslit
1.    Boston 4 – Orlando Magic 2
2.    Clevaland Cavaliers 3 – Toronto Raptors 4
Úrslit Austurdeildar:
Boston Celtics 4 – Toronto Raptors 2

Úrslitakeppni Vesturströnd:
8 lið úrslit
1.    Los Angeles Lakers 4 - Dallas Mavericks 1
2.    Houston Rockets 4 – Utah Jazz 3
3.    Portland Trailblazers * 4 - Phoenix Suns 2
4.    New Orleans Hornets 4 – San antonio Spurs 2
*vinna Suðvesturriðil
4 liða úrslit
1.    Los Angeles Lakers 4 – New Orleans Hornets 3
2.    Houson Rockets 4 – Portland Trailblazers 2
Úrslit Vesturdeild

Los Angeles Lakers 3 – Houston Rockets 4

Úrslit NBA 2008-2009
Boston Celtics 4 – Houston Rockets 2
NBA Meistarar 2008-2009
BOSTON CELTICS

NBA deildin: Mín spá - austurdeildin

Austurdeild

Komast í úrslitakeppnina

1. Boston Celtics
Langbesta liðið í NBA deildinni í fyrra. Kjarninn kemur aftur, Kevin Garnett, Paul Pierce og Ray Allen auk Rajon Rondo og Kendrik Perkins skipa byrjunarliðið sem er án efa besta “starting five” í deildinni. James Posey er farinn (því miður) en aðrir munu stíga upp.  Rondo er á leiðinni að verða einn besti leikstjórnandi deildarinnar og Tony Allen hefur spilað vel í undirbúningsleikjunum auk Leon Powe. “Big Baby” Davis mætti alltof þungur í undrbúningstímailið en hann virðist vera að koma til í síðustu leikjum undirbúningstímabilsins. Gabe Pruitt hefur einnig staðið sig vel ásamt stórskyttunni Eddie House. Patrick O’Bryant er sjö feta miðherjinn sem vantaði til að skipta inn fyrir Perkins. Nýliðarnir Walker og Giddens eiga eitthvað í land sérstaklega sá síðarnefndi. Spái svipuðu tímabili  og í fyrra – hugsanlega enn betra!
2. Cleveland Cavaliers

LeBron James er líkast til besti körfuknattleiksmaður heims! Já - ok - nokkrir koma svo sem til greina en James er bara þvílíkt “phenomen” að annað eins hefur ekki sést að ég held. Clevaland liðið stendur náttúrulega og fellur algjörlega með LeBron þannig að ef hann verður eitthvað frá vegna meiðsla má búast við hruni hjá liðinu. Veitti Boston mesta keppni í úrslitakeppninni í fyrra en það dugði ekki til. Liðið hefur fengið til sín Mo Williams til að stjórna leik liðsins, Ilgauskas er á góðum degi frábær miðherji, Wally Szczerbiak getur raðað niður körfum og Delonte West getur spilað ás og tvist fyrir liðið. Ekki má gleyma Ben Wallace sem átti sennilega eitt lakasta tímabil sitt í fyrra. Hann er bara algjörlega út á túni í sóknum liðsins! Kemur ekki að sök ef LeBron heldur uppteknum hætti
3. Toronto Raptors
Losuðu sig við T.J. Ford og náðu í Jermaine O’Neal til að spila við hlið Chris Bosh (sem mér þótti standa sig mun betur en Howard á OL). Liðið spilaði á köflum frábæran sóknarkörfubolta í fyrra; boltinn gekk manna í millum þar til gjörsamlega opið skot var nýtt. Verður athyglisvert að sjá hvernig O’Neal blandast í liðið en blandan hefur ekki virkað alveg fullkomlega í undirbúningsleikjum. Jose Calderon getur á góðum degi verið frábær og það sama má segja um Bargnani og Moon. Það er kannski einmitt vandi liðsins að það spilar frábærlega einn leik og síðan ömurlega í næsta. Ég spái að þeir eigi fleiri frábæra leiki en ömurlega í vetur.
4. Orlando Magic
Dwight Howard vann (óverskuldað) NBA troðslukeppnina og var síðan með liði BNA á Ólympíuleikunum. Er ekki hefðbundinnn miðherji en gaman er að horfa á hann spila körfubolta! Nema þá á vítalínunni! Liðið skartar skemmtilegum sóknarmönnum í Rashard Lewis, Jamaar Nelson og Hedu Turkoglu auk þess sem Micheal Pietrus bættist við liðið til að styrkja vörnina. Getur brugðið til beggja vona hjá Magic í ár, ekki síst ef Howard bætir vítanýtinguna!
5. Detroit Pistons
Detroit liðið má muna fífil sinn fegri. Einn skemmtilegasti leikstjórnandi deildarinnar, Chauncey Billups var farinn að láta á sjá á síðasta tímabili, er ekki jafn fljótur og hann var og verður því að treysta meira á stærðina og kraftinn en áður. Rip Hamilton á eftir að hlaupa endalaust í gegnum skrín og Rasheed Wallace gæti verið einn besti leikmaður deildarinnar en hann virðist hafa allt á herðum sér og er tilbúinn að fara í kappræður við dómara af minnsta tilefni. Held að Detroit liðið sé að byrja að dala og eftir timabilið í ár verði talsvert um sölur/skiptum á leikmönnum. Rétt að taka fram að Kwame Brown er kominn til liðsins en hvort hann á eftir að sýna eitthvað í vetur er STÓR spurning.
6. Philadelphia 76ers
Elton Brand! Já ég endurtek Elton Brand! Mikið mun mæða á honum í vetur og verður spennandi að sjá hvort hann nær fyrri styrk. Virkaði frekar “úr takti” í fyrsta leiknum á undirbúningstímabilinu. 76ers liðið gæti orðið mjög sterkt í vetur og ég ætla að vera jákvæður gagnvart þeim og spá þeim góðu gengi í vetur.  Iguodala er skemmtilegur leikmaður sem hefur verið að bæta sig með hverju árinu og Andre Miller er frábær leikstjórnandi. 
7. Atlanta Hawks
Ungt lið sem getur unnið hvaða lið sem er og tapað fyrir hverjum sem er líka. Mike Bibby breytti leik liðins til hins betra er hann kom til liðsins á miðjum vetri og liðið stórbætti vinningshutfallið eftir komu hans. Josh Childress fór til Evrópu! Þannig að nú þarf Acie Earl að læra leikstjórnandann undir handleiðslu Bibby. Joe Johnson og Joe Smith munu sjá um skorun ásamt Marvin Williams sem hefur alla burði til að verða afburða NBA leikmaður og Al Horford sýndi skemmtilega takta í fyrra. Liðið kynntist því hvernig er að leika í úrslitakeppninni í fyrra og koma reynslunni ríkari til leiks í vetur.
8. New York Knicks
Hér fara spennandi hlutir að gerast!  Mike D’Antoni tekinn við liðinu og hefur þegar breytt leik liðsins til hins betra. Nú verða vonandi (fyrir NY) betri tímar framundan! David Lee hefur leikið frábærlega á undirbúningstímabilinu eftir að hann var settur í byrjunarliðið. Jamaal Crawford er einnig leikmaður sem er vert að fylgjast með svo og Chris Duhon. Litli maðurinn Nate Robinson er baráttujaxl dauðans en “stóru mennirnir” Eddie Curry og Zack Randolph virðast ekki ná að blómstra saman. Spurning hvort þeir verða báðir í NY yfir allt tímabilið. D’Antoni er hrifinn af nýliðanum Danilo Gallinari en hann hefur ekki spilað á undirbúningstímabilinu vegna meiðsla. Þá er ósvarað spurningunni um Stephon Marbury en hann hefur komið af bekknum í undirbúningsleikjum og staðið sig ágætlega en mestar líkur eru á að hann verði látinn fara frá félaginu.  NY verður spútnikliðið sem kemur á óvart í austurdeildinni og rétt mer sæti í úrslitakeppninni.

Komast ekki í úrslitakeppnina

9. Milwaukee Bucks
Létu Yi í skiptum fyrir Richard Jefferson sem ætti að geta virkað vel. Michael Redd er skotmaður af guðs náð og hann og Jefferson ættu að bera uppi sóknarþunga liðsins. Andrew Bogut hefur verið að bæta sig hvert tímabil og hugsanlegt að þetta sé tímabilið sem hann spryngur út! Joe Alexander er nýliði sem þeir binda vonir við en ég spái að liðið rétt missi af úrslitakepnninni.
10. Washington Wizards
Tekst Wizards að komast í úrslitakeppnina fimmta árið í röð? Ég held því miður ekki, meiðsli eru að fara illa með liðið. “Agent Zero” Gilbert Arenas missti nánast af öllu síðasta tímabili en sjálfstraustið er amk í lagi hjá honum; Antawn Jamison er frábær leikmaður en meiðslagjarn og Brendan Haywood er hugsanlega frá vegna meiðsla í allan vetur. Juan Dixon og Caron Butler verða að stíga upp ef liðið á að gera eitthvað í vetur. Hér held ég að miklar hræringar og breytingar á leikmannahópi séu í vændum í vetur.
11. Chicago Bulls
Chicago liðið spilaði undarlegan körfubolta síðasta vetur þar sem allt virtist ganga út á að taka langskot í hverri sókn! Liðið valdi Derrick Rose í nýliðavalinu og eru miklar vonir bundnar við hann sem leikstjórnanda, verður spennandi að fylgjast með honum í vetur. Kirk Heinrich er einnig leikstjórnandi sem gaman er að. Nocioni var jafnbesti maður liðsins í fyrra mikill baráttujaxl. Jóakim Noah, Lual Deng og Tim Thomas eru ferskir “íþróttamenn” sem hafa átt ójafna leiki og verða að stabilisera sig til Bulls nái árangri. Held að Vinny Del Negro nái ekki miklu úr liðinu og að þeir muni vera virkir á leikmannamarkaðinum í vetur og næsta sumar.
12. Miami Heat
Úff! NBA titill fyrir tveimur tímabilum og svo síðasti vetur: 67 töp í 82 leikjum! Geta hlutirnir lagast í Miami? Held það gerist ekki í ár. Dwayne Wade er náttúrulega með bestu mönnum deildarinnar og Shawn Marion getur skorað með undarlegast skoti deildarinnar en lítið annað jákvætt hægt að telja upp! Miami valdi Micheal Beasley í nýliðavalinu og hann gæti hugsanlega orðið nýliði ársins ef hann léki með öðru liði. Held að Miami sé enn að finna leið úr holunni og eigi langt í land.
13. Indiana Pacers
Verði T.J. Ford meiðslalaus í vetur getur Indianaliðið gert góða hluti. Eru með fullt af “role players” en gaman verður að fylgjast með þróun Danny Grnager sem hefur bætt sig á hverju ári. Hafa átt við “leikmannavandamál” að stríða undanfarin ár, leikmenn verið í einhverri vitleysu utan vallar og innan en nú ætti það að vera búið en liðið verður að finna sinn karakter í vetur ef eitthvað á að ganga hjá þeim í vetur. Nokkrur ungir skemmtilegir leikmenn eru  mála hjá félaginu og verðu athyglisvert að sjá hvernig tekst til hjá Indiana á næstu árum en það gerist ekki í vetur.
14. Charlotte Bobcats
Einhvernveginn sé ég þetta ekki ganga upp hjá Bobcats, Larry Brown að þjálfa unga NBA leikmenn? Fer ekki saman! Sean May kominn úr meiðslum, Adam Morrison einnig, Gerald Wallace átti við meisli að stríða í fyrra en er jafnbesti leikmaður liðsins. Raymond Felton, Emeka Okafor og Jason Richardsson allt frábærir leikmann. Liðið getur spilað stórskemmtilegan körfubolta en bara allt of sjaldan! Fylgist með í vetur þegar leikmenn loka á Larry Brown hver af öðrum og leikur liðsins verður ekki til fyrirmyndar. Ætli Jordan ætli sér að taka við þjálfarastöðunni þegar allt fer í vitleysu?
15. New Jersey Nets
Lawrence Frank á erfiðan vetur fyrir höndum og ólíklegt að Sideline-ið hans Brynjars Karls komi til bjargar! Vince Carter er náttúrulega stórkostlegur leikmaður á góðum degi en þeir eru bara ekki nógu margir og þar sem þetta er liðið hans Vince þá verður gengið ekki brösugt heldur. Liðið er að flytja á nýjan heimavöll og “endurbygging” liðsins er hafin. Nets létu Kidd fara og Jefferson en fengu Devin Harris og Yi í staðinn, laaaaaaangur vetur framundan.

NBA deildin: Mín spá - vesturdeild

Vesturdeild

Komast í úrslitakeppnina:

1. Los Angeles Lakers: Ættu jafnvel að geta átt betra tímabil en í fyrra.  Sumir vilja meina að þeir hafi verið ári á undan áætlun sl. keppnistímabil. Andrew Bynum kominn úr meiðslum og Pau Gasol og Kobe Bryant þekkja hvorn annan betur. Standa og falla með Kobe (!) - einhversstaðar sagði tölfræði að ef hann tekur meira en 20 skot í leik þá tapi liðið mun oftar en það vinnur. Jackson þjálfari mun halda mönnum (les Kobe) í skefjum, spurning hvort Lamar Odom verði hjá liðinu í allan vetur.
2. Houston Rockets: Það verður athyglisvert að sjá hvað gerist í Houston. Verður Tracy McGrady mikið frá vegna meiðsla og það sama má segja um Yao Ming, en þeir hafa misst af fjölmörgum leikjum undanfarin tímabil. Ron Artest bættist í liðið fyrir tímabilið og verður athyglisvert að fylgjast með honum en á góðum degi er hann frábær leikmaður. Spái því að allt gangi upp hjá Houston og þeir verði með bestu liðum í vesturdeildinni
3. Phoenix Suns: Hvernig verður að horfa á Suns spila rólegan “half court” körfubolta? Veit ekki alveg hvað gerist á þessum bæ en lið með Steve Nash, Shaq og Stoudemire getur ekki verið slakt held ég! Spái liðinu frábæru gengi og jafnvel í úrslit.
4. New Orleans Hornets: Chris Paul og félagar eru reynslunni ríkari og hafa fengið til liðs við sig James Posey frá Meisturunum. Held samt að þeir verði ekki eins sterkir og í fyrra en þá var virkilega gaman að sjá þá spila.
5. San Antonio Spurs: Hér er stórt spurningamerki. Undanfarin ár hafa menn átt það til að afskrifa Spurs en lið með Tim Duncan innanborðs er alltaf líklegt til afreka. Tony Parker þarf að líta af aðþrengdu eiginkonunni og einbeita sér að körfunni og Manu Ginobili verður að vera heill heilsu (hann byrjar á sjukralista) til að liðið nái árangri. Spái lakara vinningshlutfalli en í fyrra en í úrslitakeppninni er aldrei að vita hvað gerist hjá liðinu, liðið er þrungið reynslu og með einn besta þjálfara NBA deildarinnar.
6. Portland Trail Blazers: Spái því að hér fari spútnik lið deildarinnar í ár. Liðið lék á köflum stórskemmtilegan körfuknattleik í fyrra og hefur síðan fengið Greg Oden sem liðið valdi með fyrsta valrétti í fyrra. Oden ætti að geta bætt vörnina talsvert og ungt lið Portland gæti óvænt náð verulega góðum árangri eins og New Orleans liðið gerði í fyrra.
7. Utah Jazz: Ég hef einhvernveginn aldrei verið hrifinn af Utah liðinu þrátt fyrir Jazz nafnið! Innan raða liðsins eru frábærir leikmenn, t.d. einn besti leikstjórnandi deildarinnar Deron Williams og Carlos Boozer ásamt Andrei Kirilenko. Held að liðið verði á svipuðu róli og í fyrra.
8. Dallas Mavericks: Margir telja að Dallas komist ekki í úrslitin, ég spái að þeir komist þangað en detti hugsanlega út fljótt. Dirk Nowitzki verður að fara að stíga upp og vera “maðurinn” ef það gerist ekki held ég að hann verði seldur annað. Jason Kidd er einn af bestu leikstjórnendum í sögu deildarinnar en grátlegt var að sjá til hans á Óympíuleikunum í Kína þegar andstæðingarnir löbbuðu framhjá honum að vild. Rick Carlisle er nýr þjálfari liðsins og hann mun leggja meiri áherslu á vörnina hjá Dallas en undanfarin ár.

Komast ekki í úrslitakeppnina
9. Denver Nuggets: Skemmtileg staðreynd um 1990-1991 Denver liðið; liðið skoraði flest stig að meðaltali eða um 118 stig per leik! Samt tapaði liðið leikjum með 12 stigum að meðaltali. Ætli Denver liðið í ár sé ekki svipað? Carmelo Anthony og Allen Iverson ættu að skora nánast að vild, en það ættu andstæðingarnir að gera líka! Spái að annar hvor þeirra verði seldur í vetur. Kannski george Karl þjálfari verði fyrsti þjálfarinn til að vera rekinn í ár?
10. Minnesota Timberwolves: Minnesota liðið á eftir að geta orðið eitt skemmtilegasta lið deildarinnar...en það gerist ekki í vetur. Al Jefferson byrjar tímabilið meiddur og Kevin Love gæti orðið ofarlega í vali um nýliða ársins.  Held að ef liðið heldur kjarnanum næstu tvö til þrjú árin þá komist þeir í úrslitakeppnina.
11. Golden State Warriors: Hef litla trú á Warriors í ár. Helst að Don Nelson dragi einhverja enn eina snilldina upp úr þjálfaraerminni, held það dugi ekki og að Warriors komist ekki í úrslitakeppnina.
12. Sacramento Kings: Hef litla trú á Kings í ár. Artest farinn og Kevin Martin er mikill skorari en hann er ekki leikmaður til að byggja lið á.
13. Los Angeles Clippers: Hvað er hægt að segja um þetta lið (eða kannski eigendurna) hafa valið marga góða leikmenn í nýliðavali en þeir virðast stökkva frá skipi um leið og þeir geta. Síðasta dæmið er Elton Brand sem fór beint af meiðslalista til Philadelphia 76ers. Það er alltaf gaman að horfa á Baron Davis spila en ég vildi gjarnan sjá hann í betra liði (Boston anyone?).
14. Oklahoma City 'Thunder': Næsta stórstjarna NBA deildarinnar? Kevin Duratn sýndi á köflum frábæra sóknartakta í fyrra en þarf að ná betri tökum á vörninni til að fá saæmdarheitið.  Lítið annað að gerast þar.
15. Memphis Grizzlies:  Liðið sem gaf Lakers Pau Gasol! Hvernig fer um einn skemmtilegast nýliðann í ár í lélegu liði? O.J Mayo hefur spilað vel í æfingaleikjunum en lítið annað spennandi að gerast hjá liðinu. Held þeir verði auðveld bráð í vetur.

Leiðindi í gifsi

Mikið er leiðinlegt að vera rúmliggjandi heima hjá sér í gifsi! Er búinn að liggja heima með fætur upp í loft í 10 daga og allar bækur og allar dvd myndir skoðaðar!

Sér nú fyrir endan á þessu - losna við þetta gifsi á þriðjudaginn kemur en fæ þá göngugifsi/spelku sem ég má stíga í - mikið hlakka ég til!

Lét laga vinstri ökklann sem hafði verið lúinn sl. þrjú ár eftir slæma tognun á Barónamóti 2005! Kom á daginn að ég hafði brákast á einhverju beinanna í ökklanum og því kannski eðlilegt að hann virkaði ekki sem skildi.

Verð vonandi kominn á beinu brautina í næstu viku!

Evil Dead: The Musical!!!

Ekki sá ég þetta fyrir, Sam Raimi gerði þrjár myndir nánast eftir sama handritinu, Evil Dead, Evil Dead 2 og Evil Dead 3: The Army of Darkness. Allt snilldar myndir, en húmorinn kannski mestur í Army of Darkness. Nú er sem sagt búið að gera söngleik byggðan á sama (svipuðu) handriti sem hefur gengið all vel "Off Broadway". Ekki nóg með það heldur er Sam Raimi nú beðinn um að gefa leyfi fyrir því að kvikmynd verði gerð eftir söngleiknum.

Ég ætla að reyna að komast á Evil Dead: The Musical ef tækifæri gefst í næstu New York ferð og ef myndin verður að veruleika verður brunað í bíó!

 

Skilst að uppvakningarnir fái öll bestu lagin!!

 

Sjá gagnrýni scifi.com