NBA deildin: Mín spá - vesturdeild

Vesturdeild

Komast í úrslitakeppnina:

1. Los Angeles Lakers: Ættu jafnvel að geta átt betra tímabil en í fyrra.  Sumir vilja meina að þeir hafi verið ári á undan áætlun sl. keppnistímabil. Andrew Bynum kominn úr meiðslum og Pau Gasol og Kobe Bryant þekkja hvorn annan betur. Standa og falla með Kobe (!) - einhversstaðar sagði tölfræði að ef hann tekur meira en 20 skot í leik þá tapi liðið mun oftar en það vinnur. Jackson þjálfari mun halda mönnum (les Kobe) í skefjum, spurning hvort Lamar Odom verði hjá liðinu í allan vetur.
2. Houston Rockets: Það verður athyglisvert að sjá hvað gerist í Houston. Verður Tracy McGrady mikið frá vegna meiðsla og það sama má segja um Yao Ming, en þeir hafa misst af fjölmörgum leikjum undanfarin tímabil. Ron Artest bættist í liðið fyrir tímabilið og verður athyglisvert að fylgjast með honum en á góðum degi er hann frábær leikmaður. Spái því að allt gangi upp hjá Houston og þeir verði með bestu liðum í vesturdeildinni
3. Phoenix Suns: Hvernig verður að horfa á Suns spila rólegan “half court” körfubolta? Veit ekki alveg hvað gerist á þessum bæ en lið með Steve Nash, Shaq og Stoudemire getur ekki verið slakt held ég! Spái liðinu frábæru gengi og jafnvel í úrslit.
4. New Orleans Hornets: Chris Paul og félagar eru reynslunni ríkari og hafa fengið til liðs við sig James Posey frá Meisturunum. Held samt að þeir verði ekki eins sterkir og í fyrra en þá var virkilega gaman að sjá þá spila.
5. San Antonio Spurs: Hér er stórt spurningamerki. Undanfarin ár hafa menn átt það til að afskrifa Spurs en lið með Tim Duncan innanborðs er alltaf líklegt til afreka. Tony Parker þarf að líta af aðþrengdu eiginkonunni og einbeita sér að körfunni og Manu Ginobili verður að vera heill heilsu (hann byrjar á sjukralista) til að liðið nái árangri. Spái lakara vinningshlutfalli en í fyrra en í úrslitakeppninni er aldrei að vita hvað gerist hjá liðinu, liðið er þrungið reynslu og með einn besta þjálfara NBA deildarinnar.
6. Portland Trail Blazers: Spái því að hér fari spútnik lið deildarinnar í ár. Liðið lék á köflum stórskemmtilegan körfuknattleik í fyrra og hefur síðan fengið Greg Oden sem liðið valdi með fyrsta valrétti í fyrra. Oden ætti að geta bætt vörnina talsvert og ungt lið Portland gæti óvænt náð verulega góðum árangri eins og New Orleans liðið gerði í fyrra.
7. Utah Jazz: Ég hef einhvernveginn aldrei verið hrifinn af Utah liðinu þrátt fyrir Jazz nafnið! Innan raða liðsins eru frábærir leikmenn, t.d. einn besti leikstjórnandi deildarinnar Deron Williams og Carlos Boozer ásamt Andrei Kirilenko. Held að liðið verði á svipuðu róli og í fyrra.
8. Dallas Mavericks: Margir telja að Dallas komist ekki í úrslitin, ég spái að þeir komist þangað en detti hugsanlega út fljótt. Dirk Nowitzki verður að fara að stíga upp og vera “maðurinn” ef það gerist ekki held ég að hann verði seldur annað. Jason Kidd er einn af bestu leikstjórnendum í sögu deildarinnar en grátlegt var að sjá til hans á Óympíuleikunum í Kína þegar andstæðingarnir löbbuðu framhjá honum að vild. Rick Carlisle er nýr þjálfari liðsins og hann mun leggja meiri áherslu á vörnina hjá Dallas en undanfarin ár.

Komast ekki í úrslitakeppnina
9. Denver Nuggets: Skemmtileg staðreynd um 1990-1991 Denver liðið; liðið skoraði flest stig að meðaltali eða um 118 stig per leik! Samt tapaði liðið leikjum með 12 stigum að meðaltali. Ætli Denver liðið í ár sé ekki svipað? Carmelo Anthony og Allen Iverson ættu að skora nánast að vild, en það ættu andstæðingarnir að gera líka! Spái að annar hvor þeirra verði seldur í vetur. Kannski george Karl þjálfari verði fyrsti þjálfarinn til að vera rekinn í ár?
10. Minnesota Timberwolves: Minnesota liðið á eftir að geta orðið eitt skemmtilegasta lið deildarinnar...en það gerist ekki í vetur. Al Jefferson byrjar tímabilið meiddur og Kevin Love gæti orðið ofarlega í vali um nýliða ársins.  Held að ef liðið heldur kjarnanum næstu tvö til þrjú árin þá komist þeir í úrslitakeppnina.
11. Golden State Warriors: Hef litla trú á Warriors í ár. Helst að Don Nelson dragi einhverja enn eina snilldina upp úr þjálfaraerminni, held það dugi ekki og að Warriors komist ekki í úrslitakeppnina.
12. Sacramento Kings: Hef litla trú á Kings í ár. Artest farinn og Kevin Martin er mikill skorari en hann er ekki leikmaður til að byggja lið á.
13. Los Angeles Clippers: Hvað er hægt að segja um þetta lið (eða kannski eigendurna) hafa valið marga góða leikmenn í nýliðavali en þeir virðast stökkva frá skipi um leið og þeir geta. Síðasta dæmið er Elton Brand sem fór beint af meiðslalista til Philadelphia 76ers. Það er alltaf gaman að horfa á Baron Davis spila en ég vildi gjarnan sjá hann í betra liði (Boston anyone?).
14. Oklahoma City 'Thunder': Næsta stórstjarna NBA deildarinnar? Kevin Duratn sýndi á köflum frábæra sóknartakta í fyrra en þarf að ná betri tökum á vörninni til að fá saæmdarheitið.  Lítið annað að gerast þar.
15. Memphis Grizzlies:  Liðið sem gaf Lakers Pau Gasol! Hvernig fer um einn skemmtilegast nýliðann í ár í lélegu liði? O.J Mayo hefur spilað vel í æfingaleikjunum en lítið annað spennandi að gerast hjá liðinu. Held þeir verði auðveld bráð í vetur.

Athugasemdir

[Arnar Steinn , 16.10.2008 kl. 11:34]

Áhugaverð spá Hannes minn. Get verið sammála þér í flestu, nema að ég held að Kings verði ofar á þessum lista. Beno Udrih er kominn til vits og ára og fær loks að stjórna liði, hann hefur litið mjög vel út í pre-season leikjum. John Salmon og Garcia eiga til að gleymast, en þetta eru topp leikmenn, hógværir og láta verkin tala.

Denver verður sennilega líka ofar, þrátt fyrir að kannast ekki við hugtakið "vörn". Suns unnu allavega ógrynni leikja án þess að nenna að lyfta fingri í varnartilgangi. Þar að auki segir Melo sig vera topp varnarmann; hann hafi sýnt það á ÓL í Beijing og að hann ætli að setja tóninn í vetur. Pass the puke-bucket please.

Að lokum: Houston-menn gætu orðið magnaðir í vetur, en það er vitað mál að það vantar marga kafla, forgang og niðurlag í þann mann. Þegar hann var spurður hvort hann hefði "mellowed out" þá svaraði hann pent: nei. Yao Ming hefur hins vegar lært af biturri meiðsla-reynslu sinni og ætlar að tempra mínútur sínar og æfingar í vetur svo hann komist nú heill í úrslitin. Þessi maður er fæddur sigurvegari og nennir alls ekki að fara í gegnum enn eitt seasonið til að horfa á úrslitakeppnina í gifsi. 

Spurs eru Spurs, stórhættulegir í úrslitum og alltaf líklegir.

 En Boston mun að sjálfsögðu rúlla þessu upp í vetur, enda komnir með nýjan Walker, nema að þessi getur hreyft sig og er mun meiri töffari.

[Arnar Steinn , 16.10.2008 kl. 11:36]

ah, alltsvo, þegar ég talaði um "þann mann" átti ég að sjálfsögðu við Ron Artest, en ég reikna með að allir hafa áttað sig á því.

kv. 

[Hannes Birgir Hjálmarsson, 16.10.2008 kl. 13:32]

já fattaði Artest að sjálfsögðu!

Vek athygli á því að austurstrandarspáin er eftir auk þess sem ég ætla að spá fyrir um úrslitakeppnina miðað við spánna mína. Gæti komið mörgum á óvart (amk vesturhlutinn!). Þetta er jú bara spá um röðun liða inn í úrslitakeppnina, verður gaman að sjá hvernig spáin rætist!